وتباسى – سۇيىسپەنشىلىك, سىيلاستىق, ىنتىماقتىق پەن پاراساتتىلىق باستاۋى, ادام عۇمىرىنىڭ تىرەگى عانا ەمەس, قوعامنىڭ دا باستى نەگىزى. وسىناۋ قىمبات قازىنالار كورىنىس تاپقان «مەرەيلى وتباسى» بايقاۋى ونەگەلى وتباسىلارىنىڭ ارامىزدا كوپتىگىمەن قۋانتۋدا. سولاردىڭ قاتارىندا ساندىقتاۋ اۋدانىنىڭ قۇرمەتتى جاندارى مۋحيندەر دە بار.
وبلىستىق باسەكەدە مۋحيندەر وتباسى جۇلدەلى ەكىنشى ورىندى جەڭىپ العاندا جۇرتشىلىق ريزا كوڭىلمەن قول سوقتى. مۇنىڭ وزىندىك سەبەبى دە بار ەدى. بۇل – ينتەرناتسيونالدىق وتباسى. ەكىنشىدەن, مۋحيندەر بالا-شاعاسىنىڭ, نەمەرە-شوپشەكتەرىنىڭ كوپتىگىمەن ەمەس, دارىندى ەكى بالا تاربيەلەپ, سپورتتىق جارىستاردا بايراعىمىزدى بيىكتەتۋىمەن ەرەكشەلەنگەن جاس وتاۋ يەلەرى. ۇلتتىق بايقاۋدىڭ مازمۇنى وسى تۇرعىدان دا كەڭەيە تۇسەتىنى انىق. الەكساندر مۋحين مەن ساۋلە تۇرلىبەكوۆا 1993 جىلدىڭ 10 ساۋىرىندە شاڭىراق كوتەرگەن. جاس سپورتشىلار ۋاقىتتىڭ قيىندىعىنان عانا ەمەس, كاسىبي تالاپتىڭ قاتاڭدىعىنان دا بولار, رەسەيدىڭ ەكاتەرينبۋرگ, بيسك قالالارىندا, ءتىپتى, موڭعوليادا تۇرۋعا ءماجبۇر بولعان. اقىرىندا تۋعان ەلگە ورالىپ, مىنە, 15 جىل بويى اۋدان ورتالىعى بالقاشىننىڭ تىرشىلىگىن گۇلدەندىرۋگە ۇلەس قوسۋدا.
مۇندا ولار اۋىلدىق جەرگە اسا قاجەت سپورتتىڭ شاڭعى جانە بياتلون تۇرىنەن جاتتىقتىرۋشى بولىپ قىزمەتكە كىرىسكەن بولاتىن. مۋحيندەر سۇيىكتى جۇمىسىنا بىلەك سىبانا كىرىسىپ, دارىندى بالالاردى سپورت الەمىنە تارتۋمەن قاتار, وڭىردە سالاماتتى ءومىر سالتىن قالىپتاستىرۋعا بەلسەنە اتسالىسىپ كەلەدى. بۇل كۇندەرى ەرلى-زايىپتى جاتتىقتىرۋشىلاردىڭ تاربيەسىن العان جيىرماعا جۋىق تالانتتى جاس سپورت شەبەرى جانە كانديداتى اتاعىن الدى. وسى ارقىلى ولار بالقاشىنعا ىرگەلەس كامەنكا سەلوسىنىڭ تۋماسى, حالىقارالىق دارەجەدەگى سپورت شەبەرى, 1988 جىلعى وليمپيادا ويىندارىنىڭ ۆيتسە-چەمپيونى جانە 1987 جىلعى الەم چەمپيوناتىنىڭ كۇمىس جۇلدەگەرى ۆلاديمير ساحنوۆتىڭ, جالپى ساندىقتاۋلىقتاردىڭ ابىرويلى ءداستۇرىن جالعاستىرۋدا.
شاڭىراق يەسى الەكساندر مۋحيننىڭ ءوزى بياتلوننان سپورت شەبەرى, جوعارى دارەجەلى جاتتىقتىرۋشى بولسا, زايىبى دا جوعارى دارەجەلى جاتتىقتىرۋشى ءارى سپورت شەبەرلىگىنە كانديدات. سونداي-اق, الەكساندر قازاقستان رەسپۋبليكاسى ۇلتتىق قۇراماسىن جاتتىقتىرسا, ساۋلە سپورتتا دارىندى بالالار مەكتەپ-ينتەرناتىنداعى بالالاردى شاڭعى سپورتىنا باۋلۋدا. بابالارىمىز: «ۇيادا نە كورسەڭ, ۇشقاندا سونى ىلەرسىڭ» دەيتىن ۇلاعات قالدىرۋى تەگىن ەمەس. ادامنىڭ تۇلعا رەتىندەگى قالىپتاسۋى وتباسىنان باستالاتىنى دا داۋ تۋدىرمايدى. وتباسىلىق ابىرويدى ۇلدارى 21 جاستاعى رينات پەن 17-گە كەلگەن ساشا سپورتتى جوعارى تابىستارىمەن ەسەلەۋدە. وسى ۇلداردىڭ ەكەۋى دە شاڭعى سپورتىنان ەلىمىزدىڭ ۇلتتىق قۇراماسىنىڭ مۇشەسى. ولار الماتىداعى الەم چەمپيوناتىندا ءساتتى ونەر كورسەتىپ, حالىقارالىق تۋرنيرلەردەن جۇلدەلى ورالۋدا. اسىرەسە, كىشى الەكساندردىڭ اياق الىسى جاقسى. ول – بياتلوننان ازيا چەمپيونى, كوماندالىق ەسەپتە اۆسترياداعى حالىقارالىق جارىستىڭ كۇمىس مەدالىن جەڭىپ الدى. ەندەشە, مۋحيندەر وتباسىن قالىپتاسقان سپورتتىق اۋلەت دەۋگە تولىق نەگىز بار دەپ بىلەمىز.
– وسىناۋ ينتەرناتسيونالدىق جانە سپورتتىق وتباسى شىن ءمانىندەگى ءبىزدىڭ ماقتانىشىمىز, – دەيدى اۋدان اكىمىنىڭ ورىنباسارى ۆاسيلي گوروحوۆوداتسكي. اۋدانىمىزدىڭ قوعامدىق ومىرىنە بەلسەنە قاتىساتىن ولار وزدەرىن ۇلگىلى قىرلارىمەن تانىتۋى ارقىلى كوپشىلىكتىڭ زور قۇرمەتىنە بولەنۋدە. مۋحيندەردى قازاقستاننىڭ ناعىز پاتريوتتارى دەۋىمىز كەرەك. بۇل وتباسىنىڭ باستى ۇستانىمى قازاقستان پرەزيدەنتى نۇرسۇلتان نازارباەۆتىڭ «ۇلت ساۋلىعى – ءبىزدىڭ تابىستى بولاشاعىمىزدىڭ نەگىزى» دەگەن سوزدەرى.
باقبەرگەن امالبەك,
«ەگەمەن قازاقستان».
اقمولا وبلىسى,
ساندىقتاۋ اۋدانى.
سۋرەتتە: مۋحيندەر اۋدان اكىمىنىڭ ورىنباسارى ۆ.گوروحوۆوداتسكيمەن بىرگە.